جانِ جاں تم بھی کہو گے مجھے چرخہ لے دو

مہرباں تم بھی کہو گے مجھے چرخہ لے دو

راز اس واسطے سینے میں دبائے رکھا

رازداں تم بھی کہو گے مجھے چرخہ لے دو

غم کی مہمان نوازی جو کرو گے تو پھر

میزباں تم بھی کہو گے مجھے چرخہ لے دو

شوق سے دل کو لگاؤ یہ مگر یاد رہے

دلبراں تم بھی کہو گے مجھے چرخہ لے دو

تم نے گر چاند سے منسوب کہانی سن لی

مہ وشاں تم بھی کہو گے مجھے چرخہ لے دو

زین جب عشق ستائے گا تو آہیں بھر بھر

بے کراں تم بھی کہو گے مجھے چرخہ لے دو

زینؔ شکیل