جب بھی تکمیلِ ذات ہوتی ہے

اُن سے ملنے کی بات ہوتی ہے

جوگزر جائے وصل میں ان کے

بس وہی چاند رات ہوتی ہے

با وفاؤں کی ہر کہانی میں

بے وفاؤں کی بات ہوتی ہے

کھول دیتے ہیں وہ بھی زلف اپنی

جب ہواؤں کی بات ہوتی ہے

گر اُسے بھیگنے کا شوق نہیں

کیوں گھٹاؤں کی بات ہوتی ہے

آ ہی جائے خدا خدا کر کے

جاؤں جاؤں کی بات ہوتی ہے

عشق والوں کے واسطے کتنی

مختصر کائنات ہوتی ہے

زین اُن کے نثار ہو نہ سکے

رائیگاں پھر حیات ہوتی ہے

زینؔ شکیل